إيه اللي بيحصل في سوق الدهب في مصر؟ وليه الأسعار بتهبّ فوق بشكل مش طبيعي؟ وليه شركات تصنيع الدهب بقت بتتطلع للخليج أكتر من السوق المحلي؟ ةهل ده معناه إن الدهب في مصر خلاص مش هنشوفه قريب؟ ولا فيه حاجة أكبر بتحصل؟.. فى الفيديو ده هنفهم اللعبة ونعرف ليه شركات الدهب عاملة خطة هجومية على الأسواق العالمية بدل ما تعتمد على السوق المصري وهنشوف ازاي ده مرتبط بارتفاع الأسعار اللي مخلّي الناس تشتري دهب وتخزنه كأنه كنز.
بص يا سيدي.. أسعار الدهب العالمية لشه بتتحرك ناحية الارتفاع وده لسبب بسيط الفيدرالي الأمريكي ممكن يقلل الفايدة على الدولار الفترة الجاية.. ومع كل مرة بتقل فيها الفايدة الطلب على الدهب بيزيد لأنه بيبقى ملاذ آمن للاستثمار بدل الدولار اللي مفيهوش عائد كبير
أما عندنا في مصر فالموضوع مختلف شوية.. فيه توقعات إن الدهب هيزيد بنسبة 15% السنة الجاية..و السبب أن أسعار الدولار بتعلى والجنيه المصري بيضعف فبالتالي الناس بتشتري دهب علشان تحافظ على فلوسها وده اللي مخلي السوق المحلي سخن جدًا
دلوقتي تعالَ نبص على شركات تصنيع الدهب.. الشركات دي مش بتعتمد على السوق المحلي بس بل بالعكس بدأت تخطط لاختراق أسواق جديدة خصوصًا الخليج وشمال إفريقيا.. مثلًا شركة "لازوردي" قررت ترجع للتصدير بعد توقف 4 سنين بسبب كورونا وبتخطط تزود إنتاجها بنسبة بين 10% و15% السنة الجاية.. تخيل إن الشركة دي لوحدها ليها نص السوق المصري ومع ذلك بتتطلع تصدر أكتر لدول الخليج
أما شركة "كينج جولد"، فدي كمان بتزود إنتاجها 25% السنة الجاية وبتستهدف لأول مرة إنها تصدر منتجاتها للأسواق الخارجية بدل ما تعتمد على السوق المحلي بس
طب إيه اللي خلا الشركات دي تفكر تخرج برة؟ وبتدور على التصدير أكتر؟
بكل بساطة الأسعار العالمية للدهب بقت عامل جذب كبير لما السعر يعلى الشركات بتستفيد أكتر لما تبيع برة خصوصًا في الخليج اللي الطلب فيه على المشغولات الذهبية عالي جدًاوفي نفس الوقت السوق المحلي بدأ يشهد زيادة كبيرة في الطلب على السبائك والمشغولات كمدخرات أكتر من استهلاك. الناس بقت تشتري دهب وتحوشه علشان يخزنوا قيمة فلوسهم بدل ما يسيبوها تتآكل مع ارتفاع التضخم وضعف الجنيه
ودلوقتي مصر مش بس بتفكر في إنها تصدر لكن كمان بتشتغل على تطوير قطاع التعدين وزيادة إنتاج الدهب.. عندك مثلًا منجم السكري اللي بينتج حوالي 15.8 طن دهب كل سنة وبيعتبر المورد الرئيسي للإنتاج المحلي.. والشعبة المسؤولة عن صناعة الدهب والمجوهرات قالت إنهم عايزين يخلو مصر من بين أول 10 دول في تصدير المشغولات الذهبية بحلول 2027.. وده هدف كبير جدًا مقارنة بإننا كنا من 3 سنين في مراكز متأخرة جدًا في التصدير
في الآخر.. لعبة الدهب في مصر بقت أكبر من مجرد مشغولات بنشتريها في المناسبات.. الموضوع بقى مرتبط باقتصاد كامل بيحاول يخلق فرص جديدة برة الحدود علشان يوازن الضغط على السوق المحلي
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
