يا ترى إيه اللي مخلي الساحل الشمالي فجأة يبقى مركز اهتمام الحكومة والمستثمرين الخليجيين؟ هل ممكن الساحل يتحول لواجهة استثمارية عالمية زي دبي وأبوظبي؟ وإزاي خطة الحكومة ممكن تغيّر شكل الاقتصاد المصري من خلال مدن الساحل؟
من ساعات أعلن الدكتور مصطفى مدبولي رئيس الوزراء عن شغل على الأرض لإعداد تصور متكامل لاستغلال شواطئ الساحل الشمالي
طيب يعني إيه الكلام ده؟ وإيه اللي ممكن يحصل في المنطقة دي؟
أول حاجة الساحل الشمالي مكان معروف إنه من أكتر المناطق السياحية جاذبية في مصر لكن معظم استغلاله حالياً محصور في المصايف والفيلات اللي بتقفل موسم الصيف وتدخل في "سبات شتوي".
طيب هل ده منطقي إنك تسيب شواطئ ممتدة أكتر من 500 كم كأنها موسم مؤقت؟
طبعاً لا.. وهنا بتدخل الحكومة بخطة جديدة تماماً رئيس الوزراء أكد إنهم شغالين على رؤية لاستغلال الشواطئ دي طول السنة و الهدف تحويل الساحل الشمالي من مجرد مكان سياحي موسمي لمنطقة اقتصادية وسياحية واستثمارية شغالة طول السنة
نيجي لسؤال مهم .. ليه المستثمرين الخليجيين مهتمين بالساحل الشمالي؟
ببساطة لأن المنطقة دي كنز حقيقي .. الخليج عنده شواطئ لكن الساحل الشمالي حاجة تانية مياه نقية وموقع استراتيجي قريب من أوروبا وكمان ممكن يبقى مركز لتطوير سياحة جديدة زي السياحة العلاجية والمنتجعات الرياضية العالمية وحتى مشروعات الطاقة المتجددة
وأكتر حاجة بتشد المستثمرين إن الحكومة بتتكلم بوضوح عن تحسين البنية التحتية سواء طرق مطارات أو خدمات لوجستية..يعني الاستثمار هناك مش هيبقى مخاطرة بالعكس هيبقى في بيئة محفزة تضمن أرباح طويلة الأجل
طب إيه اللي الدولة هتستفيده؟
فيه فوايد كتيرة.. مثلا جذب الاستثمارات الأجنبية هيزود العملة الصعبة اللي إحنا فعلاً محتاجينها وكمان ده هيخلق فرص عمل ضخمة للمصريين في مجالات السياحة، البناء، وحتى الخدمات اللوجستية.. كمان تطوير المنطقة دي هينعكس على الاقتصاد ككل ويدخل فلوس للدولة سواء من الضرائب أو من الاستفادة المباشرة من المشروعات
وبالمناسبة فكرة تطوير الساحل مش جديدة خالص لكن الجديد هو السرعة والجدية اللي الحكومة بدأت تتحرك بيها الفترة دي وده جزء من خطة أوسع لتطوير مصر كلها وكمان للاستفادة من الزخم الاستثماري اللي الخليج بيقدمه خاصة بعد نجاحات كبيرة في مشاريع زي العاصمة الإدارية الجديدة
التحدي هو هل هنقدر نحافظ على التوازن بين الاستثمار الضخم ده والحفاظ على البيئة والشواطئ الطبيعية؟ وهل الشغل ده هيتم بسرعة ولا ممكن يواجه تحديات؟ وهل فعلاً هيتحقق حلم إن الساحل الشمالي يبقى منافس عالمي زي مناطق زي الريفييرا الفرنسية؟
الأسئلة دي مستنين نشوف اجاباتها لكن الأكيد إن الساحل الشمالي داخل على مرحلة جديدة تماماً ومستقبل المنطقة هيعتمد على إزاي هننفذ الخطة دي بذكاء وبطريقة تخليها مكسب لينا كلنا
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
