هو سوق السيارات رايح على فين في 2025 وهل الأسعار هتنزل ولا هتفضل تزيد وايه توقعات خبراء السوق الشهور الجاية في سوق السيارات ولو بتفكر تشتري ايه الوقت المناسب.. خليكم معانا للآخر وهتعرفوا التفاصيل في التقرير ده
باقي حوالي 10 ايام على دخول السنة الجديدة 2025 والناس بتتمنى إنها تكون سنة نهاية الأزمات في المنطقة عشان الأمور تتحسن اكتر في الداخل لأن العالم كله مرتبط ببعضه ومش بس الناس اللي مستنية الأزمات تعدي لكن الأسواق والشركات كمان منتظرة تحصل انفراجة كبيرة على المستوى الاقتصادي واللي أتأثر بالظروف اللي حولينا ومنها سوق السيارات سواء الزيرو أو المستعمل .
الحقيقة سوق السيارات هو اكتر سوق أتأثر بالاحداث اللي حصلت في المنطقة ودا لأن السوق بيعتمد اعتماد شبه كلي على الاستيراد يعني على سعر الدولار وتوافره ومع اندلاع الأزمة الروسية الأوكرانية واللي رفعت أسعار السلع عالمياً بعد قرار أوروبا وامريكا فرض عقوبات على موسكو وبالتزامن مع دا ظهرت الفجوة الدولارية في مصر مع خروج اكتر من 22 مليار دولار من الأموال الساخنة وظهور السوق الموازية للعملة واضطرت الحكومة تعتمد خطة من محاور كتيرة عشان تسيطر على أزمة نقص الدولار ومنها كان ترشيد الاستيراد لانه اكبر مورد بيستنزف الدولار وتم اعتبار السيارات سلعة ترفيهية في سلم الأولويات وحظر استيرادها مع 12 سلعة تانية.
وللاسف حظر استيراد السيارات لوقت طويل في فتره من الفترات خلي فيه نقص كبير في المعروض من السيارات قصاد طلب متزايد ومتراكم ومن هنا قفزت أسعار السيارات لأرقام فلكية وحصل ركود في الأسواق سواء الزيرو أو المستعمل ورغم عودة الاستيراد بعد قرار المركزي للبنوك بتوفير الدولار لمستوردي السيارات لسه السوق ماواستردش عافيته وموصلش لنقطة التوازن بين المعروض والبيع وعشان كده فضلت الأسعار تزيد.
طيب أي توقعات أسعار السيارات في 2025؟
الحقيقة أسعار السيارات في الشهور الجاية مرهونة بزيادة المعروض من الموديلات المختلفة و أسامة أبو المجد رئيس رابطة التجار السيارات بمصر، قال ان أسعار السيارات سواء الجديدة أو المستعملة مش هتتراجع خلال الفترة الجاية ودا نتيجة عدد من المعوقات اللي بيمر بيها قطاع السيارات المحلي وقال كمان إن القطاع التجاري بسوق السيارات المصري لسه قدامه تحديات كبيرة أهمها قلة وندرة المعروض، نتيجة قرارات على رأسها قرار رقم 9 والقيود المفروضة على الاستيراد التجاري.
خبير سوق السيارات شايف كمان إن توقف الاستيراد الشخصي واحد من أبرز الأزمات اللي بيواجهها قطاع السيارات حتى سيارات ذوي الهمم المتوقع دخولها السوق المصري الفترة الجاية مش هتلبي احتياجات المواطن المصري بعد قلة الاختيارات المتاحة لكن في نفس الوقت رئيس رابطة التجار شايف إن سنة 2025 هتشهد تحول جذري في قطاع التصنيع المحلي، وتوقيع عدد كبير من البروتوكولات وتعميق الصناعة المحلية بجانب نقل العديد من أمهات الشركات العالمية داخل الأسواق المصرية ودا لو اتحقق هتكون بداية الانفراجة في السوق ونزول السيارات.
يعني الخلاصة لو عاوز تشتري سيارة فالوقت الخالي مناسب لأن السوق هيستمر في رحلة زيادة الأسعار لغاية ما ينزل الإنتاج المحلي وتزيد عمليات الاستيراد وخلي بالك فيه طلب متراكم على السيارات ودا معناه أن السوق هياخد وقت لغاية مايوفر العدد الضخم المطلوب من السيارات قبل ما يوصل لمرحلة التوازن اللي قلنا عليها.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
