شوفنا في الأيام الأخيرة، ناس كتير بتتكلم عن محفظة جوجل أو جوجل والت، وده بعد ما شركة جوجل العالمية أعلنت عن إطلاقها لأحدث خدماتها الرقمية وهي محفظتها الجديدة في مصر.
ونقدر نقول، إن "جوجل والت" هي محفظة رقمية هتشتغل في مصر بداية شهر يناير من السنة الجديدة 2025، واللي هتعتبر حل رقمي آمن وموثوق، هيتيح للمستخدمين حفظ وإدارة طرق الدفع الخاصة بيهم من خلال البطاقات أو بطاقات الهوية أو التذاكر والمفاتيح بسهولة.
كمان، محفظة Google بتعتبر تاني أداة مدفوعات رقمية أُطلقت في مصر، ومتوقع جدا انها تشتغل بعد أيام زي ما قولنا، وده بعد أيام من إتاحة شركة أبل العالمية لخدمة Apple Pay.
ولكن، استخدام المحفظة دي بيتطلب إن حضرتك تثبيت تطبيق Google Pay أو Google Wallet، بالنسبة لمستخدمين أجهزة الأندرويد، وبيفضل تختار Google Wallet بسبب مميزاتها الكتيرة، زي تخزين بطاقات الهوية، أو تذاكر الفعاليات والتصاريح وبطاقات النقل العام، وغيرها من الخدمات.
وبعد ما حضرتك تثبت Google Pay أو محفظة Google، هتحتاج تسجل الدخول لحسابك الخاص عن طريق Google، وبعد كده هتضيف طريقة الدفع كبطاقة الائتمان أو الخصم عشان تتمكن من الاستخدام بسهولة.
وبعد ما تضيف بطاقة واحدة على الأقل لحسابك، ممكن جدا تبدأا في عمل المدفوعات عن طريق تليفونك في المتاجر المختلفة.
ونقدر نقول، إن تطبيق Google Pay بيعتبر نظام للدفع الرقمي بيستخدمه الأشخاص لإجراء المعاملات المالية الإلكترونية بسهولة، وبشكل أساسي للدفع عبر الإنترنت عبر التطبيقات والمتاجر، ومن مميزاته التكامل مع مواقع التجارة الإلكترونية ودعم المدفوعات بين الأفراد وتسديد الفواتير عبر الإنترنت والدفع من خلال التطبيقات المختلفة مع إمكانية إرسال الفلوس بين الأصدقاء والعائلة، زي انستا باي كده.
كمان، الخدمتين دول هيتكاملوا مع بعض، بمعنى ان لو حضرتك هتستخدم محفظة Google فما عليك إلا فتح قفل الهاتف، وهتحطه بالقرب من رمز الدفع، والانتظار لتأكيد إتمام العملية، وده من غير ما تحتاج لفتح التطبيق، لأن التطبيققن هنا مكملان لبعضهم، وممكن تستخدمهم بسهولة عشان تغطي كل احتياجاتك المالية والرقمية.
وبطرح محفظة جوجل الجديدة، هيكون قدام المستخدمين في مصر أنواع مختلفة من المحافط الإلكترونية اللي هتسهل معاملاتهم اليومية وتنجز لهم كتير وتسهل حياتهم أكتر، ومن هنا من حق كل عميل يختار المحفظة الأفضل له
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
