صفقة المطارات الكبرى.. ليه الحكومة هتسيب إدارات المطارات للقطاع الخاص؟ - غاية التعليمية

غاية التعليمية يكتُب.. إيه اللي يخلي الحكومة تطرح كل المطارات في مصر للقطاع الخاص؟ هل دي بداية لنقلة نوعية في حركة السياحة والاستثمار؟ ولا ممكن يكون ليه تأثيرات سلبية؟ والأهم.. إيه اللي ممكن يحصل لو إدارة المطارات بقت بالكامل في إيد القطاع الخاص؟ وليه أصلا الحكومة هتتخلى عن ادارة المطارات ؟

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

فى الساعات الأخيرة  الحكومة أعلنت إنها هتطرح إدارة وتشغيل المطارات المصرية قدام القطاع الخاص.. فى اطار خطة أكبر لتحفيز الاستثمار المحلي والأجنبي.. الخطة دي بتيجي في إطار "وثيقة سياسة ملكية الدولة" اللي فكرتها ببساطة إن الحكومة تقلّل دورها في إدارة الأصول الاقتصادية وتدي الفرصة أكتر للقطاع الخاص.

لكن ليه المطارات بالتحديد؟ وليه دلوقتي؟

الحكومة بتقول إن القطاع الخاص عنده قدرة أعلى على التطوير وإدارة الأصول بشكل أكفأ خصوصًا في مجالات زي الطيران والسياحة.. وخلونا نعترف إن المطارات مش مجرد مباني بتقلّع منها الطيارات دي واجهة مصر قدام العالم وأول نقطة أي سائح بيشوفها لما ينزل البلد.. ولما القطاع الخاص يدير المطارات هيقدر يستثمر في تحسين الخدمات وتطوير البنية التحتية وزيادة كفاءة التشغيل.. وكل ده هيترجم لحاجة واحدة تجربة أفضل للمسافرين سواء كانوا سياح أو رجال أعمال.

وإيه تأثير ده على السياحة؟
مصر من أكبر الوجهات السياحية في العالم.. ومع التوسع في برامج الطيران منخفض التكلفة.. وتسهيلات التأشيرة الإلكترونية عدد السياح في ازدياد مستم.. دلوقتي المطارات محتاجة تكون جاهزة عشان تستوعب الأعداد دي وتقدم لهم تجربة سفر ممتازة.

لما القطاع الخاص يدخل هنشوف استثمارات ضخمة في الخدمات زي تحسين أماكن الانتظار وتسهيل إجراءات الدخول والخروج وزيادة عدد الرحلات الجوية.. ببساطة المطارات هتبقى مش بس بوابة دخول وخروج لكن كمان مركز اقتصادي وسياحي متكامل.

لكن هل القرار ده بدون مخاطر؟
أكيد فيه تساؤلات أهمها هل القطاع الخاص هيقدر يوفّر التوازن بين الربح وتحسين الخدمات؟ وهل هيتم مراقبة الأسعار عشان ما تزيدش بشكل كبير؟ وإيه الضمان إن المطارات تفضل تخدم أهداف الدولة الاستراتيجية؟

الحكومة بتقول إنها هتحتفظ بدورها الرقابي وإن الطرح مش معناه بيع أصول الدولة بل مجرد إسناد إدارتها للقطاع الخاص لفترة معينة.. فيه نقطة كمان مهمة وهي إن الحكومة بتسعى لتقليل العبء المالي اللي على الدولة.. وإدارة وتشغيل المطارات بيحتاج استثمارات ضخمة لتطويرها وتحسين خدماته.. والقطاع الخاص عنده الإمكانيات دي بشكل أفضل من الحكومة في بعض الأحيان.. فبدل ما الدولة تصرف كل الموارد دي بتفتح الباب قدام الشركات العالمية إنها تستثمر وتدير المطارات وفي نفس الوقت بتحقق عوائد مالية من الطرح ده.

إيه اللي ممكن نكسبه؟
فيه تجارب دول كتير نجحت في الفكرة دي.. لو بصينا على دبي مثلًا، هنلاقي مطارها الدولي من أكتر المطارات نشاطًا في العالم.. وده بسبب استثمارات القطاع الخاص اللي خلّته نموذج عالمي.. وبالنسبة لمصر الفكرة مش بس تحسين خدمات المطارات لكن كمان جذب استثمارات جديدة للسياحة والطيران.. وده معناه فرص عمل أكتر وزيادة في الإيرادات العامة وتحقيق نقلة نوعية في صورة مصر قدام العالم