فكرت تاخد قرض شخصي بس حاسس إن موضوع الضامن عائق؟ طب إيه رأيك لو تعرف إنك ممكن تاخد قرض من غير ما تحتاج لضامن خالص؟ لو عاوز تعرف ايه الشروط ؟ ومين البنوك اللى بتصرف القرض ده ؟ وازاى تختار القرض اللى يناسبك .. اقرأ هذا التقرير.
بص يا سيدي... القروض الشخصية بقت حل مثالي لكتير من الناس اللي محتاجة سيولة سريعة سواء علشان تبدأ مشروع صغير تسدد مصاريف مهمة أو حتى لو عندك أي التزام مفاجئ.. المشكلة الكبيرة اللي كانت بتواجه ناس كتير هي موضوع الضامن كتير من البنوك كانت بتشترط إن حد يضمنك علشان تقدر تاخد القرض... وده كان معناه تعقيد الأمور على ناس كتير
الخبر الحلو هو إن فيه بنوك دلوقتي بتوفر قروض شخصية من غير ضامن…وده معناه إنك ممكن تحصل على السيولة اللي محتاجها بسرعة وبشروط أبسط.
طب إيه الشروط علشان تاخد قرض من غير ضامن؟
خلينا نتفق إن الشروط دي ممكن تختلف من بنك للتاني، لكن بشكل عام البنك لازم يتأكد إن عندك دخل ثابت يضمن إنك تقدر تسدد القرض ومعظم البنوك بتشترط إن مرتبك يكون ثابت، وغالبًا بيبدأ من 2000 جنيه شهريًا، وفي بعض الحالات ممكن يشترطوا مرتب أعلى شوية
غالبية البنوك بتشترط كمان إن سنك يكون ما بين 21 لـ60 سنة. لو شغال في وظيفة حكومية أو قطاع خاص، غالبًا هيكون ليك فرصة أكبر
ولازم تقدم مستندات زي شهادة إثبات الوظيفة أو بيان الدخل لو شغال حر. البنوك بتعتمد على المستندات دي علشان تتأكد من قدرتك على السداد
كمان لو أخدت قروض قبل كده أو بتستخدم بطاقات ائتمانية، البنك هيبص على تاريخك الائتماني. لو كنت ملتزم بالسداد، فرصتك هتكون أحسن
الشروط دي مش معقدة زي ما كانت في القروض اللي محتاجة ضامن... وده بيفتح الباب لناس كتير ما كانوش بيقدروا ياخدوا قروض قبل كده
وايه أهم البنوك اللي بتوفر القروض الشخصية بدون ضامن؟
خليني أقولك على شوية بنوك معروفة بالخدمات دي البنك الأهلي المصري بييقدم قروض شخصية بدون ضامن للموظفين في القطاعين الحكومي والخاص بشرط تحويل المرتب على البنك.. القرض ممكن يوصل لـ1.5 مليون جنيه، وفترة السداد لحد 12 سنة.
بنك مصر بيتيح قروض بدون ضامن للموظفين بشرط تحويل المرتب، وبيوفر برامج مميزة لقطاع الأطباء وأساتذة الجامعات.. قيمة القرض ممكن توصل لـ500 ألف جنيه
بنك القاهرة كمان بيوفر قروض بدون ضامن بشرط إن مرتبك يكون بيتحول على البنك، وده بيضمن إنك تقدر تستفيد بمبالغ توصل لـ500 ألف جنيه، مع فترات سداد مرنة
بنك CIB (التجاري الدولي) بيقدم قروض شخصية بدون ضامن، لكن بشروط مرتب أعلى شوية. الميزة هنا إنك ممكن تاخد القرض حتى لو مش بتحول مرتبك على البنك، بشرط وجود مستندات تثبت دخلك
بنك الإسكندرية القروض فيه مناسبة جدًا للي شغالين في القطاع الخاص، مع برامج خاصة للمهنيين زي الأطباء والصيادلة..و القرض ممكن يوصل لـ2 مليون جنيه
وقبل ما تروح تقدم على قرض، لازم تاخد بالك من شوية حاجات قارن بين البنوك وما تستعجلش.. شوف أكتر من بنك، وقارن بين الفايدة، وفترة السداد، والمميزات الإضافية اللي كل بنك بيوفرها
القرض مش بس مبلغ بتاخده، هو كمان فايدة بتدفعها تأكد إنك فاهم كويس التكلفة الكلية للقرض
اختار القرض اللي يناسب احتياجاتك..
ما تاخدش مبلغ أكبر من اللي محتاجه علشان ما تدخلش نفسك في ضغط مالي مش لازم
كمان السداد في المواعيد مش بس بيحميك من غرامات لكنه كمان بيحسن تاريخك الائتماني
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
