يا ترى أسعار الدهب رايحة على فين في السنة الجديدة 2025، هل في زيادة في الأسعار العالمية واللي بتتأثر بيها الأسعار الملحية في دول كتير بينهم مصر، ولا استقرار ولا هيحصل انخفاض، وهل الناس تستعد للشراء ولا للبيع ولا توقف خالص.
سعر الدهب العالمي وصل لأعلى مستوى له على الإطلاق في سنة 2024، وسجل 2685.49 دولار أمريكي في شهر سبتمبر اللي فات، وده حصل مع زيادة في القيمة بنسبة 31.35% في أمريكا، عشان كده نقدر نقول إن السنة اللي فاتت كانت السنة الاكتر ربحية لمستثمري الدهب.
طب الأسعار رايحة فين في سنة 2025؟
بص يا سيدي، كتير من الخبراء بيتوقعوا ارتفاع أسعار الدهب في السنة الجديدة، وعلى سبيل المثال، المحللين في بنك جيه بي مورجان، قالوا إن متوسط سعر المعدن النفيس في أمريكا الشمالية هيبلغ 2950 دولارًا أمريكيًا، وكمان ممكن يوصل ل 3000 دولار أمريكي للأوقية الواحدة.
وأكد الخبراء إن التوقعات دي جت بناء على اللي بيحصل في السوق، خاصة في ظل استمرار التضخم، وتوقع سياسات أكتر تعطيلاً بشكل كبير من قبل إدارة الرئيس الأمريكي دونالد ترامب مع زيادة مخاطر النمو على الاقتصاد الأمريكي.
كمان، الخبراء في بنك أوف أمريكا ويو بي إس، وجولدمان ساكس، أبدوا وجهة نظر مماثلة، وده معناه إن سياسة سعر الفايدة اللي بيتبعها بنك الاحتياطي الفيدرالي في سنة 2025 هتكون أكتر تعقيدا.
وده طبعا، هيأثر بشكل كبير على جني الأرباح وقلة مشتريات البنوك المركزية على الدهب في سنة 2025، عشان كده قالت وكالة التصنيف "فيتش" أن توحيد سعر الدهب إلى 2000 دولار أمريكي هيكون أمر ممكن في 2025، وممكن كمان ينخفض إلى 1800 في سنة 2026.
والكلام ده معناه ان ممكن يحصل انخفاض الطلب على الدهب، في الوقت اللي هيجني فيه المستثمرين الأرباح من المعدن الأصفر بسبب الانخفاض الكبير اللي ممكن يحصل في الأسعار.
ومن ناحية تانية، الخبراء في مجموعة ING، توقعوا أن سعر الدهب هيوصل في السنة الجديدة ل 2700 دولار أمريكي، و2680 دولار أمريكي في سنة 2026، وأكدوا كمان إن ارتفاع أسعار المعدن النفيس مكمل لحد سنة ولكن ليس بقوة 2024 و2025.
طبعا، الكلام ده معناه إن الأسعار في مصر هتتأثر بالأسعار العالمية، وممكن جدا جرام 21 يسجل 4 آلاف جنيه مقفولة مع السنة الجديدة، وكمان ممكن تحصل شوية تذبذبات في الأسعار على مدار شهور السنة، يعني شوية طالع وشوية نازل، لحد ما يستقر بشكل شبه نهائي مع نهاية 2025.
عشان كده، لو حضرتك ناوي تشتري دهب للادخار أو الاستثمار أو حتى للزينة الشخصية، فحاول تنزل تشتري في أسرع وقت قبل ما تحصل ارتفاعات في السنة الجديدة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
