متابعينا الكرام في كل مكان أهلا وسهلا بكم ورصد لأهم التقارير اللي قدمتها وحدة أبحاث بانكير على مدار الساعة النهاردة الاربعاء 1 يناير 2025 على مختلف منصاتنا الالكترونية.
منصات بانكير قدمت النهاردة عدد من التقارير المهمة في الشأن الاقتصادي حلال اليوم الأول في عام 2025، والبداية مع تقرير خاص عن توقعات ومؤشرات الاقتصاد المصري في 2025.
وقال التقرير إن سنة 2024 مرت بحلوها ومرها ومصر استقبلت سنة جديدة ومنتظر فيها أحداث اقتصادية كبيرة وكتيرة على مختلف القطاعات الاقتصادية وخاصة القطاعات اللي ليها علاقة بالدولار.
قطاع السياحة الجوكر في 2025
وأشار التقرير إن قطاع السياحة هيكون القطاع الجوكر في 2025 لأنه داخل على إنطلاقة جديدة مع افتتاح أهم 3 مشروعات سياحية في تاريخ مصر واللي هتعزز قوة مصر الناعمة وتعزز مكانتها الثقافية وفي نفس الوقت مضاعفة إيرادات السياحة واول مشروع هو افتتاح مشروع المتحف المصري الكبير واللي كلف مليار ونص دولار واللي العالم كله مستنية وهيعرض أهم كنوز الحضارة الفرعونية واكتر من 5 آلاف قطعة من آثار الملك الذهبي توت عنخ امون وهو الحدث اللي شركات الطيران والسياحة والسفر العالمية مستنياه بفارغ الصبر.
ولفت تقرير بانكير إن تاني مشروع سياحي هيتم افتتاحه في 2025 هو مشروع التجلي الاعظم بشمال سيناء واللي هينقل السياحة الدينية لمستوى تاني من كل أنحاء العالم دا غير تطوير المنطقة كلها واللي هيزود من تدفقات السياحة.
مشروع تطوير القاهرة الفاطمية
أما تالت مشروع متوقع افتتاحه في 2025 فهو مشروع تطوير القاهره الفاطمية وحدائق الفسطاط واللي هتغير موازين السياحة في مصر مع جمال المنطقة وإعادة الآثار الإسلامية لمجدها.
وسلط التقرير الضوء على الانطلاقة الكبيرة في القطاع الزراعي في 2025 مع افتتاح مشروع الدلتا الجديدة، اللي بيعتبر قفزة كبيرة لتنفيذ استراتيجية الزراعة 2030 وبتوصل إجمالي مساحته 2.2 مليون فدان، كما أن المساحة المنزرعة والمستهدف زراعتها تعادل ما يقرب من 30% من مساحة الدلتا القديمة، وهو المشروع اللي هيحصل مصر لسلة غذاء كبيرة تتسع لحجم مصر، وتستطيع من خلالها التصدير للخارج.
وشرح بانكير إن فيه تطورات جديدة في ملف السياسة النقدية وإن مصر داخلة على عهد تخفيض سعر الفايدة واستقرار سعر الدولار مع زيادة تدفقات الدولار في 2025 من كل القطاعات الاقتصادية ودا غير صفقات استحواذ ضخمة في الطريق خاصة في شركات الأغذية بخلاف الاستثمارات الأجنبية المباشرة المتوقع استقطابها لمصر خلال عام 2025 واللي هتوصل الي 15 مليار دولار ودا كله بخلاف اللي بيحصل في ملف الصناعة والتجارة والموانئ وقطاع العقارات
أول تحدي للبنك المركزي في 2025
التقرير التالي اللي قدمته منصات بانكير كان بيتكلم عن أول تحدي للبنك المركزي في 2025.
وشرح بانكير إن البنك المركزي المصري هو بطل المشهد في 2024 وده بعد نجاحه في إدارة السياسة النقدية لمصر ونجاحاته في توفير الدولار ومتطلبات سداد الديون وقيمة فواتير الاستيراد من النقد الأجنبي وتجنب اي هزات في الأسواق بخلاف قدرته في إدارة ملف الفايدة والتضخم والتمويل والتفاوض مع مؤسسات التمويل وضبط السوق المصرفي.
ولفت التقرير إنه مع بداية 2025 لسه فيه تحديات كبيرة قدام البنك المركزي وأولها التضخم وإصراره على خفضه للمستويات الطبيعية والنزول بسعر الفايدة لإنعاش الأسواق والاقتراض ودفع القطاعات الاقتصادية للامام والبنك المركزي المصري أعلن عن جدول مواعيد انعقاد لجنة السياسة النقدية واللي هتبدأ بأول اجتماع في 20 فبراير اللي جاي يعني بعد 50 يوم من دلوقتي لبحث أسعار الفائدة على الإيداع والإقراض.
وشرح بانكير إن اجتماع فبراير الجاي هيكون صعب وتحدي ودا لأن اجتماع لجنة السياسة النقدية هيكون قبل شهر رمضان بحوالي 10 ايام فقط وزي ما احنا عارفين إن الطلب على السلع بيزيد قبل حلول الشهر الكريم ودا لأن الأسر المصرية بتتجه لشراء خزين ومتطلبات وسلع رمضان قبلها بفترة وزيادة الطلب على السلع هيرفع من أسعارها وبالتالي هيرفع من نسب التضخم ودا هيحط لجنة السياسة النقدية في موقف صعب لأن التضخم بيقود جهود تخفيض سعر الفايدة.
ولفت بانكير إن الحكومة وجهاز حماية المستهلك عندهم خطط ومبادرات واعلنوا عنها لتوفير سلع رمضان بأسعار مناسبة وتوجيهات لسلاسل المتاجر بتثبيت أسعار السلع خلال رمضان وعدم رفعها بجانب المعارض اللي بتعرض السلع بأسعار مخفضة ودا ممكن يساهم إن نسب التضخم مترفعش اكتر من المستهدف.
الاخبار السارة للمصريين في 2025
وحدة أبحاث بانكير قدمت تقرير خاص النهاردة عن الاخبار السارة للمصريين في 2025.
ولفت التقرير إن الحكومة قررت تبكير صرف مرتبات يناير واللي هتبدأ من 22 يناير وكمان، هيبدأ صرف المرتبات شهر فبراير يوم 23 فبراير، ومرتبات مارس هيبدأ صرفها 23 مارس.
وأشار تقرير بانكير إن الحكومة بتدرس زيادة المرتبات 2025 ولكن لم يتم البت فيها لحد دلوقتي، ووفقا لكلام مجدي البدوي، نائب رئيس اتحاد عمال مصر وعضو المجلس القومي للأجور، أكد إن القرار النهائي بزيادة المرتبات ممكن يعلن عنه خلال أيام.
وسلط التقرير الضوء على زيادة المعاشات، أو بالتحديد زيادة الحد الأدنى للمعاشات، واللي اكظتغ هيئة التأمينات الإجتماعية، إن هيتم تطبيق قرار زيادة الحد الأدنى للمعاش وزيادة حدين أجر الاشتراك التأميني، لكل المؤمن عليهم بدءا من انهاردة 1 يناير 2025، وبكده يكون في حوالي 11.5 مليون مواطن من أصحاب المعاشات هيستفيدوا من قرار الزيادة.
وأشار التقرير لتالت خبر سعيد في 2025، وهو استقرار أسعار السيارات الجديدة، وده اللي أكده المستشار أسامة أبو المجد، رئيس رابطة تجار السيارات لما قال إن سنة 2025 هتشهد استقرار بشكل كبير في أسعار السيارت الجديدة لعدد من الطرازات، وده هيكون لعدد من الأسباب.
منصات بانكير قدمت تقرير مختلف عن دعم البنوك للمزارعين والقطاع الزراعي المصري.
ولفت إن البنوك المصرية بالتعاون مع الدولة أطلقت مبادرات كتير لدعم الفلاحين والمزارعين.. لتقديم تسهيلات بتراعي ظروف الفلاحين وتساعدهم يواجهوا تحديات الزراعة
وسلط التقرير الضوء على مبادرة التمويل الزراعي بفائدة منخفضة واللي أطلقها البنك المركزي المصري بفائدة بسيطة جداً 5% فقط، لتمويل المشاريع الزراعية الصغيرة وشرح إن المبادرة دي بتساعد الفلاحين يحصلوا على قروض يقدروا يستخدموها في شراء معدات حديثة أو بذور وأسمدة أو حتى تطوير أنظمة الري.
ولفت التقرير إن فيه قروض ميسرة للمشاريع الزراعية وإن البنك الزراعي المصري بيوفر برامج تمويلية ميسّرة..و القروض دي بتدي الفلاح فرصة يشتغل على زراعة المحاصيل اللي محتاجة تكلفة أولية كبيرة.. زي القمح والذرة وقصب السكر.
وقال التقرير إن البنوك المصرية بتدعم كمان الفلاحين اللي شغالين في تربية المواشي والدواجن من خلال مبادرة إحياء البتلو اللي بتوفر قروض بفوايد مخفضة لتربية العجول وتسمينها عشان تزود الإنتاج المحلي من اللحوم.
وشرح كمان إن البنوك بتدعم المزارعين في التحول لأنظمة زراعة مستدامة وصديقة للبيئة زي الري بالتنقيط والطاقة الشمسية.. بنط زي البنك الأهلي المصري مثلاً أطلق برامج لتمويل مشاريع الطاقة الشمسية اللي بتساعد الفلاح يقلل تكاليف الكهرباء ويوفر ميه لري أراضيه.
كمان البنوك بتدي تسهيلات السداد للمزارعين لأن القروض الزراعية بتيجي بشروط سداد مرنة تناسب طبيعة عمل الفلاح اللي بيستنى موسم الحصاد عشان يحقق دخل.. كمان فيه بعض المبادرات اللي بتقدم تمويل عشان يقدر الفلاح يشتري معدات حديثة تساعده يزود إنتاجه بأقل تكلفو والبنوك بتوفر استشارات مالية للفلاحين عشان يعرفوا إزاي يديروا القروض ويستغلوها بطريقة صحيحة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
