هو ممكن مصر تبقي زي كوريا الجنوبية وصادراتها توصل ل684 مليار دولار في السنة وليه بنقارن نفسنا بكوريا تحديدا وازاي وصلت لكده وهل مصر عندها الإمكانيات أنها تبقي غول اقتصادي عالمي وليه.
كوريا الجنوبية صدرت منتجات في 2024 بحوالي 684 مليار دولار.. ايوا زي ما حضرتك سمعت كده الرقم دا حققته في سنة واحدة.. ياترى كوريا الجنوبية وصلت لكده ازاي؟
شوف حضرتك كوريا الجنوبية قبل 50 سنة كانت من أشد الدول فقرا ودا بعد استقلالها من الاحتلال الياباني والتدمير اللي حصل لها في الحرب الثانية لكن قررت تخرج من اللي هي فيه وفكرت بشكل علمي ازاي تحقق نمو اقتصادي سريع وفي نفس الوقت مستدام وكانت الخلطة السحرية في امتلاك التكنولوجيا الحديثة الخاصة بيها وعملت نظام علمي متقدم ربطته بسوق العمل وخرجت كوادر عملية اعتمدت على الابتكار والجودة في كل المنتجات وعشان كده حلّت كوريا الجنوبية في المرتبة العاشرة في مؤشر الابتكار العالمي سنة 2023 وبعدها بسنة واحدة احتلت كوريا المركز السادس بين دول العالم وفق مؤشر الابتكار لسنة 2024.
وأساس اقتصاد كوريا قام على حاجة إسمها شركات التشايبول الكورية أو (التكتلات الكورية) لإنتاج منتجات منخفضة التكلفة لكن تطورت تدريجي إلى أطراف فاعلة عالميا تبيع منتجات مبتكرة ومتميزة يعني ببساطة اقتصاد كوريا الجنوبية قام على إنشاء شركات ضخمة ودعمها رسميا وحكوميا للمنافسة دوليا ومساعدتها أنها تنجح وتنتج وفي نفس الوقت الشركات دي كانت ملزمة تطلع منتجات بجودة عالية جدا ومفيهاش غلطة وهي نفسها الشركات العالمية اللي بتدخل مليارات الدولارات لكوريا من خلال تصدير منتجاتها زي سامسونج وكيا وإطارات هانكوك واس كيه جروب وال جي اليكترونيكس وعشان كده شركة زي سامسونج دلوقتي قيمتها حوالي 400 مليار دولار .
والشركات دي قدرت تتوسع عالميا وتصدر بأرقام خرافية وقدرت في ظرف 30 سنة وهي المدة اللي احتاجتها كوريا الجنوبية عشان تنهض اقتصاديا وتدخل نادي العشرين الكبار في العالم ويبقي اقتصادها من أكبر اقتصاديات العالم.
طيب مصر فين من كوريا الجنوبية ؟
فيه تشابه بين الاقتصاد المصري والكوري رغم الفارق الكبير في الأرقام أولها أن مصر فيها عمالة رخيصة ومدربة وفيه نوابغ تقدر تقود شركات كتير زي ما بدأت كوريا نهضتها الاقتصادية وكمان مصر عندها فرصة أكبر من كوريا الجنوبية في نظام شركات التشايبول الكورية واللي هيبقي (التكتلات المصرية ) وهي أنها عندها شركات كبيرة بالفعل لكن لسه موصلتش للعالمية ومحتاجة تتعلم الدرس الكرويي في إنتاج منتجات منخفضة التكلفة ومع التركيز على الجودة ودا هيديها ميزة في كتير من الأسواق وبعدها تتطور بشكل تدريجي وكمان مصر عندها أسواق حوليها ضخمة جدا تقدر تسوق بيها منتجاتها وفي نفس الوقت عندها موقع جغرافي فريد بيديها منافسة وقيمة مضافة في وقت النقل والتصدير وتقليل كلفة تصدير المنتجات للأسواق القريبة خاصة في الشرق الأوسط وأوروبا وأفريقيا.
مصر بدأت رحلة ال100 مليار دولار صادرات وقربت منها ودي بداية حقيقية وقوية وكوريا احتاجت 30 سنة عشان توصل لأرقام التصدير الضخمة دي والرقم دا مش بعيد على مصر لو فضلت مستمرة في سياسة توطين الصناعات والتوسع الصناعي وانشاء ودعم شركات قوية وتوصيلها للعالمية مع تعديل نظام التعليم وربطه بسوق العمل الحديث ودا اللي أكد عليه الرئيس السيسي ومش عاوزين ننسىى إن مصر عندها إمكانيات اقتصادية وتنوع اقتصادي فريد من صناعة وتعدين وسياحة وقناة السويس وموانئ وزراعة ونوابغ في قطاع التكنولوجيا وتقدر تحقق منه نهضة ضخمة وتكون رقم في الاقتصاد العالمي ودا اللي استندت عليه مؤسسات عالمية لما قالت إن الاقتصاد المصري هيوصل للمرتبة السابعة عالميا ما بين أقوي الاقتصاديات.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
