هو ليه البنك المركزي المصري أعلن بيع أذون خزانة بالدولار بقيمة 980.5 مليون دولار؟ وهل القرار ده ممكن يخفف أزمة الدولار في السوق؟ والأهم يعني إيه أصلاً أذون خزانة؟ ومن اللي بيشتريها؟
خلونا نبدأ معاكم الموضوع من الأول .. هو يعني إيه هي أذون الخزانة بالدولار؟
أذون الخزانة ببساطة هي أداة مالية بتصدرها الحكومة لجمع فلوس في وقت سريع و لما نقول "أذون خزانة بالدولار" ده معناه إن الحكومة المصرية من خلال البنك المركزي بتقترض بالدولار من المستثمرين لفترة قصيرة (سنة في الحالة دي). وبتوعدهم إنها ترجع لهم الفلوس بالدولاربالإضافة لفائدة معينة اللي هي هنا 4.5%.
طب ليه بالدولار مش بالجنيه؟
عشان مصر بتحتاج دولارات كتير سواء لسداد ديونها الخارجية أو لدفع تكلفة الواردات خاصة إن الدولار بقى عملة نادرة في السوق المصري بسبب نقص المعروض طول السنتين اللي قاتوا فالحكومة بتلجأ لأذون الخزانة بالدولار عشان تسد العجز ده وتحافظ على التزاماتها الدولية
طب مين اللي بيشتري أذون الخزانة دي؟
البنوك المصرية بتشتري نسبة كبيرة لأنها بتثق إن الحكومة هتسدد الفلوس في الوقت المحدد .. وكمان المستثمرين الأجانب بيشوفوا إن أذون الخزانة فرصة مربحة خاصة لو العائد (الفائدة) مغري مقارنة بدول تانية
والبنك المركزي المصري بيطرح الأذون دي في مزادات رسمية والبنوك والمستثمرين بيتنافسوا على الشراء والهدف من الطرح البنك المركزي بيحاول يجمع أكبر قيمة ممكنة بالدولار بأقل عائد ممكن
وإيه تأثير بيع أذون الخزانة على أزمة الدولار؟
الأذون بالدولار ممكن تساعد في حل أزمة الدولار بشكل مؤقت لأنها بتوفّر سيولة دولارية للحكومة والفلوس دي غالبًا بتروح لسداد أقساط الديون الخارجية عشان مصر ما تتأخرش في سداد التزاماتها الدولية وكمان بتروح دعم الاحتياطي النقدي الأجنبي اللي بيستعمله البنك المركزي في استقرار الجنيه قدام الدولار
لكن الحل ده أشبه بـ"مسكن" لأن الحكومة في النهاية لازم تسدد الفلوس للمستثمرين ومع الفائدة كمان وده بيزود الضغط على الموازنة في المستقبل.
طب إيه الحل على المدى الطويل؟
تحفيز الاستثمار الأجنبي من خلال دخول شركات ومصانع جديدة يعني توفير دولارات للسوق.. وكمان زيادة الصادرات لان كل ما صدرنا أكتر كل ما جالنا دولارات أكتر.. مع دعم السياحة لأنها مصدر رئيسي وسريع للعملة الصعبة
في النهاية.. بيع أذون الخزانة بالدولار خطوة ضرورية في الوقت الحالي عشان تحل أزمة السيولة الدولارية مؤقتًا لكنها مش حل دائم.. و الاقتصاد المصري محتاج خطة طويلة الأجل لزيادة موارده من العملة الصعبة وتقليل اعتماده على الاقتراض الخارجي
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
