دولارات من كل حتة.. صادرات مصر الغذائية عملت مفاجأة ورقم تاريخي

لو قلتلك إن مصر حققت إنجاز تاريخي في 10 شهور بس... تصدقني؟ طب لو قلتلك إن الرقم ده مش بس إنجاز عادي، ده ممكن يغير شكل الاقتصاد ويحل أزمة الدولار... إيه رأيك؟ طب، تفتكر إيه المنتج اللي خلا مصر تكسر كل التوقعات دي؟ اللي هتقراة ده هيفاجئك.

فيه طفرة ونمو كبير بيحصل فى صادرات مصر ى كل القطاعات تقريبا .. وواحد من أهم القطاعات اللى حصل فيها الطفرة دي صادرات الصناعات الغذائية اللي وصلت لـ 5.1 مليار دولار في أول 10 شهور من السنة دي مقارنة بـ 4.3 مليار دولار السنة اللي فاتت .. وده مش بس نمو... دي أكبر نسبة وأعلى قيمة في تاريخ القطاع

طيب مين بيستورد كل ده؟

أكتر من نص الصادرات دي، حوالي 53% رايحة للدول العربية بقيمةوصلت لـ 2.675 مليار دولار. والاتحاد الأوروبي كمان لعب دور كبير بصادرات وصلت لـ 1.023 مليار دولار وحققوا أكبر نسبة نمو بحوالي 38%.. وحتى السوق الأمريكي دخل بقوة بصادرات قيمتها 277 مليون دولار بنسبة نمو زي الاتحاد الأوروبي 38%!.. وعشان ما ننساش إفريقيا، صادراتنا للدول الإفريقية غير العربية زادت كمان بنسبة 11%، بقيمة 425 مليون دولار.

طب إيه المنتجات اللي عملت الشغل الكبير ده؟

فيه حاجات تصدرت المشهد زي مركزات صناعة المشروبات الغازية اللي حققت صادرات بـ 463 مليون دولار، وده بزيادة 8% عن السنة اللي فاتت.. والفراولة المجمدة خدت نصيبها برضو بحوالي 353 مليون دولار، بنمو 15%.. وخليني أفاجئك... العصاير كمان كانت نجم جديد بنسبة نمو 79%

طب ليه كل ده مهم؟

بص يا سيدي كل دولار بيخش من الصادرات دي معناه إن في مصدر جديد للعملة الصعبة وده بيخفف الضغط على الاقتصاد بمعنى تاني الصناعات الغذائية ممكن تبقى "جوكر" مصر في مواجهة أزمة الدولار.. وعلى فكرة لما الصادرات تكبر بالشكل ده ده معناه كمان فرص شغل أكتر، واستثمارات جديدة، واهتمام عالمي بالصناعة المصرية.

المهم هنا  إزاي نقدر نحافظ على النجاح ده وإيه اللي يخلي الأرقام دي مش مجرد "طفرة" مؤقتة وازاى الحكومة والدولة يشتغلوا على اننا نفتح أسواق جديدة ونزود التصدير أكتر وأكتر

اللي لازم تفهمه إن الأرقام دي مش مجرد إحصائيات دي فرص عمل أكتر للمصريين واستثمارات جديدة وكمان حل عملي لأزمة الدولار اللي بتواجهنا