يا ترى إيه هي أهداف الفريق كامل الوزير، نائب رئيس الوزراء ووزير النقل والصناعة، من زيارته لإيطاليا دلوقتي، هل هيعمل صفقات خاصة بقطاع النقل، وإيه هي مكاسب الزيارة دي.. هنقولك كل التفاصيل في التقرير ده.
في الساعات الأخيرة، الفريق كامل الوزير تفقد عدد من محطات شبكة القطارات السريعة في ايطاليا، وكمان استقل القطار السريع من روما حتى ميلان، ومش بس كده ده التقى برؤساء ومسئولي 7 من كبريات الشركات الايطالية العالمية المتخصصة في مجالي النقل والصناعة.
وكل ده هدف كامل الوزير بحث إنشاء عدد من المصانع الجديدة بمصر وتوطين عدد من الصناعات بها، عشان تلبي احتياجات السوق المحلي وبعد كده نصدر للخارج.
الوزير تفقد محطة روما المركزية للقطارات السريعة ومحطة التحكم وده حصل مع بداية ذروة تحرك الركاب على شبكة الخطوط المختلفة داخل إيطاليا.
الوزير غالبا كان بيجرب شبكة القطارات السريعة وبيعرف أدق التفاصيل لتشغيلها عشان احنا بنفذ في مصر شبكة قطارات سريعة بأطوال ألفين كيلو متر، وهتشتغل أول مرحلة فيها خلال سنة تقريبا، فالوزير بيتابع ويراقب ويجرب المنظومة في إيطاليا كويس قبل تشغيلها في مصر، وده طبعا لأن إيطاليا من أكتر الدول المتقدمة في المجال ده.
وبالنسبة لملف الصناعة، فالوزير التقى برؤساء الشركات الايطالية العالمية المتخصصة في مجالي الصناعة والنقل بمقر بنك انتيسا سان باولو، وبحث الوزير مع رئيس شركة بياجيو الإيطالية المتخصصة في إنتاج الدراجات البخارية، إمكانية عملها في مصر
وبالفعل، تم التباحث على قيام الشركة بدراسة إعادة فتح مصنع لها بالسوق المصري كمان، بحث كامل الوزير مع رئيس شركة اريستون المتخصصة في تصنيع الأجهزة المنزلية، إمكانية التوسع بالسوق المصري، لأن فرع الشركة في مصر عنده 3 مصانع في مدينة العبور، وقال الوزير، إن السوق المصري بقى مقصد استثماري لمختلف العلامات التجارية العالمية في مجال الأجهزة المنزلية، ومرحب بأي مستثمر للعمل في مصر، ووعد كمان بتسهيل كل الإجراءات له من أجل تعزيز استثماراته وزيادة أرباحه.
وفي لقائه مع رئيس شركة نافيجو الإيطالية المتخصصة في إنتاج اليخوت الفاخرة واللي شغالة في دول كتير، فأكدت الشركة على الاهتمام الكبير اللي بتوليه للتوسع في مجال انتاج اليخوت على مستوى العالم، وخاصة في مصر اللي بتعتبر مقصد سياحي عالمي، وبتتميز بموقع فريد، وفيها كل عوامل الجذب الخاص بسياحة اليخوت.
وكل الشركات دي، أكدت للوزير أنها بالفعل بتعمل دراسات لدخول السوق المصري والاستثمار فيه، وقريب جدا هنشوف الشغل ده موجود على أرض الواقع، واللي هدفه هو زيادة الاستثمارات انعاش الاقتصادي المصري، واللي بالتالي كل ده هينعكس بالإيجاب على تحسين مستوى المعيشة وهيعود بالخير على المواطن البسيط.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
