فاكرين لما كانت الكلمة المشهورة على لسان الناس في الشارع 'مافيش سيولة'؟ طب فاكرين لما ناس كتير كانت بتحاول تنشر اشاعات ان البنوك مفيهاش فلوس وان مدرخرات الناس فى البنوك هتضيع؟ .. البنك المركزي رد على كل الناس اللى بتتكلم وخلاص وأخرس كل اللسنة وأعلن إن السيولة المحلية زادت بـ2.4 تريليون جنيه في سنة واحدة بس.. بس يا ترى إيه أصلاً معنى كلمة سيولة؟ وليه زيادتها أو نقصها تفرق معانا؟
أول حاجة لما بنقول "سيولة محلية" فإحنا بنتكلم عن كل الفلوس اللي موجودة في السوق المصرية..و دي بتشمل الكاش اللي مع الناس وكمان اللي جوه البنوك سواء ودائع أو حسابات باختصار هي المؤشر اللي بيقولك الاقتصاد المصري "ماشي إزاي"
طب ايه أهمية السيولة دي؟
السيولة ببساطة هي الدم اللي بيجري في عروق الاقتصاد.. لما السيولة تزيد الشركات تقدر تسدد ديونها الناس تلاقي فلوس تشتري احتياجاتها والمشاريع الجديدة تتحرك ولو السيولة قلت؟ الدنيا تبقى واقفة الأسواق تضعف وحركة البيع والشراء تتأثر
وخلونا نبص على أرقام 2024 في يناير السيولة كانت حوالي 8.983 تريليون جنيه.. وشهر ورا شهر المعدلات بتزيد 9.124 تريليون في فبراير، و10.975 تريليون في أبريل.. ومع نهاية أكتوبر الرقم ده كسر حاجز 11.247 تريليون جنيه.. يعني زيادة بـ 2.4 تريليون جنيه في 10 شهور بس
طب إيه اللي بيخلي السيولة تزيد بالشكل ده؟
في عوامل كتيرأهمها زيادة الإيداعات في البنوك الناس والشركات بتحط فلوسها في حسابات وودايع. مثلاً الودايع تحت الطلب وصلت لـ 1.614 تريليون جنيه بنهاية سبتمبر..أشباه النقود ودي زي شهادات الاستثمار والودائع لأجل اللي سجلت حوالي 8.469 تريليون جنيه.. وكمان النقد المتداول بره البنوك واللى وصل وفقا لتقديرات شيه رسمية لـ 1.163 تريليون جنيه بنهاية سبتمبر يعني لسه فيه جزء كبير من الكاش بيتحرك في السوق
طب ده معناه إيه؟
ليها معانى كتيرة طبعا أولها ارتفاع السيولة معناه إن فيه حركة اقتصادية سواء من الحكومة أو من القطاع الخاص.. لكن زيادة السيولة بشكل كبير ممكن تضغط على الأسعار وتزود التضخم لو ما كانتش مصحوبة بإنتاج أكبر وسلع أكتر في السوق وده يبرر ليبه المركزي كل شوية بيسحب سيولة من البنوك
بس الأهم هل السيولة دي بتستخدم في استثمارات حقيقية ولا بتتحول لزيادات في الأسعار؟ وده السؤال اللي لازم نبقى كلنا مركزين عليه.
في الآخر السيولة المحلية زيها زي أي مؤشر اقتصادي كبير مكن تكون مؤشر على نمو اقتصادي صحي أو مؤشر على مشاكل لازم ننتبه لها والأرقام لوحدها مش كفاية لازم نفهم اللي وراها
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
