يا ترى ليه فجأة مصر قررت الزام شركات المناطق الحرة انها تسدد استهلاك الغاز بالدولار؟ وإزاي القرار ده ممكن يساعد في زيادة موارد العملة الصعبة للبلد؟ وهل ده هيكون ليه تأثير على الأسعار أو المشروعات الاستثمارية؟.. في الفيديو ده هنشرحلكم الموضوع ببساطة ونحاول نفهم معناه وتأثيره الحقيقي على الاقتصاد خصوصًا في وقت كل جنيه وكل دولار ليهم قيمة كبيرة في تحقيق الاستقرار الاقتصادي.
في الساعات الأخيرة أصدر رئيس مجلس الوزراء الدكتور مصطفي مدبولي، قرارا يقضي بسداد قيمة استهلاك الغاز الطبيعي لمشروعات المناطق الحرة والمناطق الاقتصادية بالدولار.. وذكرت الجريدة الرسمية أن القرار تضمن كمان سداد قيمة استهلاك الغاز للمشروعات خارج المناطق الحرة بالمعادل بالجنيه المصري وفقا لمتوسط سعر الدولار المعلن رسميا من البنك المركزي المصري خلال الشهر السابق لفترة الاستهلاك محل المحاسبة
طب القرار معناه إيه؟
القرار الجديد بيقول إن الشركات اللي شغالة في المناطق الحرة والمناطق الاقتصادية هتسدد استهلاكها من الغاز الطبيعي بالدولار أما باقي المشروعات خارج المناطق دي فهتسدد بالجنيه المصري بس على أساس متوسط سعر الدولار الرسمي المعلن من البنك المركزي للشهر اللي فات
بمعنى تاني.. الحكومة عايزة تستفيد من الشركات اللي عندها دخل بالدولار زي التصدير إنها تسدد بالعملة دي بدل الجنيه وده بشكل مباشر بيساعد البلد في زيادة موارد العملة الصعبة.
طب ليه القرار ده؟
مصر في الفترة الأخيرة بتحاول بكل الطرق إنها تزود مواردها من العملة الأجنبية عشان تواجه نقص العملة الصعبة لأن الاقتصاد محتاج دولارات عشان يسدد التزامات زي الديون واستيراد السلع الأساسية.. كمان مصر ملتزمة باتفاق مع صندوق النقد بيشمل إصلاحات اقتصادية ومن ضمنها تعزيز الاحتياطي الأجنبي وتطبيق سعر صرف مرن.. وخد بالك برضوا لما الشركات تسدد بالدولار الحكومة بتقلل طلبها على شراء الدولار من السوق وده ممكن يساعد في استقرار سعر الصرف
طب هل فيه تأثير على الشركات والمستثمرين
الشركات اللي شغالة في المناطق الحرة والمناطق الاقتصادية غالبًا بتتعامل بالدولار لأن شغلها بيكون موجه للتصدير فبالتالي القرار مش هيكون عبء كبير عليها بالعكس الشركات دي هتستفيد من وجود نظام محاسبي واضح ومعتمد على السعر الرسمي للدولار وده بيقلل أي مخاطر في التقييم.. لكن الشركات اللي بتعتمد جزئيًا على السوق المحلي ممكن تواجه تحديات لو دخلها الأساسي بالجنيه وده يضغط على أرباحها
بس بعيدا عن مين كسبان ومين أرباحه هتقل خلينا نبص للصورة بشكل اوسع لما الشركات تدفع بالدولار ده بيضيف للحكومة مصدر مستدام للعملة الصعبة بدل ما تضطر تشتريها من السوق والقرار ده خطوة صغيرة لكنها فعالة في دعم الاحتياطي الأجنبي لمواجهة أي أزمات أو التزامات مالية.. والحكومة بتحاول توازن بين متطلبات السوق وشروط صندوق النقد عشان تمنع أي تراجع جديد للجنيه والدكتور مدبولي قالها بصراحة: "مش هيكون فيه تعويم بمعنى الكلمة، الدولار هيزيد وينخفض حسب السوق".
طب هل ده ممكن يرفع الأسعار؟
القرار في حد ذاته مش مرتبط بالمستهلك العادي لأنه بيستهدف الشركات لكن لو الشركات قررت تحمل التكلفة دي على المنتجات ممكن يحصل ارتفاع في أسعار بعض السلع الموجهة للسوق المحلي
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
