يا ترى ايه اللى هيحصل فى اسعار الدهب 2025 ؟ وهل المعدن النفيس هيواصل قفزاته ولا ممكن الدنيا تهدا وتستقر شوية؟ وهل التوترات الجيوسياسية ممكن تأثر على أسعار الدهب ؟ وايه الوضع عندنا فى مصر؟
في آخر توقعات السوق العالمية الدهب بيتجه لمسارات جديدة.. المؤسسات الكبيرة زي جيه بي مورجان وجولدمان ساكس شايفة إن الأوقية ممكن توصل لمستويات بين 2800 لـ 3000 دولار بحلول نهاية 2025.
حد ممكن يسأل ويقول ليه التوقعات بتقول ارتفاع؟
ببساطة، لأن عوامل زي التوترات الجيوسياسية و زي الحرب المستمرة في أوكرانيا والعلاقات المتوترة بين أمريكا والصين بتخلي المستثمرين يشوفوا الدهب كأفضل ملاذ آمن.. وكمان توقعات التضخم والركود الاقتصادي المتوقع خلال السنتين الجايين بيدفع الناس لتخزين قيمة فلوسهم في حاجة زي الدهب اللي دايما بيحتفظ بقيمته على المدى الطويل
و خلينا نوضح حاجة مهمة السياسات النقدية الأمريكية هتكون عامل حاسم.. لو الفيدرالي الأمريكي استمر في تخفيض أسعار الفايدة ده هيزود جاذبية الدهب للمستثمرين وده معناه دعم للأسعار العالمية.. لكن فيه نقطة تضغط ع السوق وهي احتمالية تصحيح الأسعار على المدى القصير بسبب تغير الطلب
طب وبالنسبة لأسعار الدهب فى مصر؟
على المستوى المحلي الوضع أكتر تعقيدا لأن الدهب في مصر مش بس بيتأثر بالسعر العالمي لكن كمان بسعر الدولار مقابل الجنيه.. ومع استمرار التذبذب في سعر الصرف والضغوط على الاحتياطي النقدي طبيعي جدًا إن أسعار الجرام في مصر تفضل في اتجاه صاعد.. في 2024 مثلًا شفنا مستويات تاريخية لأسعار الجرام والتوقعات بتقول إن في 2025 هيكمل الارتفاع والسبب زيادة الطلب من المصريين كوسيلة للتحوط من التضخم خصوصًا مع تآكل قيمة العملة كمان التحويلات المالية من الخارج بتلعب دور في دعم حركة شراء الدهب داخل مصر لكن بشكل غير كافي لتغطية الطلب العالي
طب لو حضرتك بتفكر تستثمر فى الدهب ايه النصايح اللى لازم تاخد بالك منها؟
لو بتفكر تستثمر في الدهب لازم تاخد بالك من الحاجات دي .. الاستثمار طويل المدى هو الأفضل.. اشتري النهاردة واصبر 6 شهور على الأقل عشان تضمن تحقيق مكسب السوق حاليًا مضطرب لكن الاتجاه العام صاعد على المدى الطويل.. كمان تابع المؤشرات الاقتصادية زي أسعار الفايدة في أمريكا وسعر الدولار في مصر لأن أي تغيير فيهم هيأثر مباشرة على سعر الدهب.. وأهم حاج فكر بحكمة الدهب هو أداة للتحوط والاستثمار الآمن، لكنه مش وسيلة للربح السريع قراراتك لازم تكون مدروسة
الخلاصة ومن الآخر الدهب مش مجرد معدن.. هو لعبة معقدة بين الاقتصاد والسياسة.. ومع التوقعات الصعودية للسوق العالمي والمحلي ممكن تقول إننا في بداية مرحلة جديدة للدهب.. فكر قبل ما تقرر واستثمر بحذر وافتكر دايمًا المعلومة الصح هي المفتاح في سوق الدهب
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
