هو ليه سعر الدولار بيتحرك يوميا فى البنوك المصرية؟ وايه سعر الصعود المتواصل في سعر العملة الأمريكية؟ وسعر الجنية ممكن يوصل لفين ؟ وهل كل اللى بيحصل طبيعي ولا فيه حاجة تقلق فى الموضوع؟
فى الساعات الأخيرة واصل الدولار ارتفاعه مقابل الجنيه ووصل لأرقام جديدة وقياسية لأول مرة.. في بعض البنوك زي أبوظبي الإسلامي والمصرف العربي الدولي وصل السعر لـ 50.63 جنيه للبيع، و50.53 جنيه للشراء أما في البنوك الحكومية زي الأهلي المصري ومصر والقاهرة، سجل الدولار 50.38 جنيه للبيع، و50.28 جنيه للشراء. وحتى في بنوك تانية زي الإسكندرية، وصل لـ 50.43 للبيع.
طيب، ليه الأسعار بتتحرك؟
خلينا نفهم حاجة مهمة.. التحركات دي مش أزمة خالص بل الأهم كمان انها طبيعية جدا و نتيجة مباشرة لتطبيق سياسة مرونة سعر الصرف اللي البنك المركزي المصري أعلن عنها.
يعني إيه الكلام ده ؟
ببساطة الجنيه مش مربوط بسعر ثابت قدام الدولار لكنه بيتحرك حسب العرض والطلب.. والسياسة دي هدفها إن السوق يتفاعل بشكل طبيعي مع المعروض من العملة الأجنبية والاحتياجات المحلية
طب هل الوضع ده فيه أى حاجة تقلق؟
الإجابة يوضوح لا .. ورئيس الحكومة مصطفى مدبولي كان أكد قبل كده إن التحركات في سعر الصرف دلوقتي بتحصل في حدود آمنة .. يعني التذبذب ده طبيعي ومقبول طالما مفيش قفزات عنيفة أو غير مبررة.. الفكرة إن السوق لسه في مرحلة ضبط طبيعي وده جزء من إصلاح اقتصادي شامل
طب إيه اللي حصل الأيام اللي فاتت؟
الدولار كان حصلتله قفزة ملحوظة في تعاملات امبارح ووصل لـ 50.27 جنيه.. جزء من الحركة دي كان بسبب تطورات سياسية واقتصادية في المنطقة زي اللي بيحصل في سوريا واللي دايمًا ليه تأثير غير مباشر على أسواق العملات في الدول النامية
طب ده معناه إيه للمواطن؟
التحركات في الأسعار مش بالضرورة معناها تدهور لكن انعكاس لتغيرات في السوق والحكومة والبنك المركزي شغالين على توفير الدولار وتثبيت الاقتصاد بشكل عام وطالما سعر الدولار بيتحرك في الحدود الآمنة مفيش داعي للقلق الكبير
طب الجنيه ممكن يوصل لفين؟
السؤال ده مهم لكن الحقيقة إن سعر الصرف بيتحدد حسب عوامل كتير منها حجم الطلب على الدولار للاستيراد والإيرادات من السياحة، والصادرات، وتحويلات المصريين بالخارج وكمان التدفقات النقدية من الاستثمارات الأجنبية.. وطالما الاقتصاد قادر يولّد إيرادات من المصادر دي ده بيساعد في توازن السوق
لكن المهم ان الدولار متوافر والبنوك قادرة توفره لأى حد بيطلبه من المستوردين والشركات واللى بيحصل ده جزء من عملية إصلاح اقتصادي شاملة وسياسة مرونة سعر الصرف هي وسيلة للوصول لاستقرار حقيقي على المدى الطويل والأهم إن الحكومة والبنك المركزي شغالين لضمان إن التذبذبات دي ما تكونش خارج السيطرة
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
