الحكومة حاليا فتحت صفحة جديدا مع المستثمرين والناس اللي عليهم ضرائب متراكمة من سنين طويلة، وكمان قدمت تسهيلات كبيرة في ملفات التسوية الضريبية.. وده بهدف تقنين اوضاع كل الشركات الموجودة في مصر.. ياتري اية اللي عملته مصر علشان تزود وتقنن وضع كل الشركات.. واية هيا التسهيلات الضريبية اللي قدمتها الحكومة ليهم
الفترة دي الحكومة فتحت صفحة جديدة في قطاعات كتيرة في الدولة واحد من اهم الملفات هيا الملفات الضريبية وتسوية الضرائب اللي بقالها سنين وكانت سبب اساسي في توقف انشطة شركات كتيرة كانت بتمثل جزء هام في الصناعات المحلية للدولة، وكانت سبب اساسي في توفير المنتجات المحلية للمواطنين واللي بعد المصانع والشركات دي توقفت عن العمل اضطرت الحكومة لفتح استيراد أنواع كتيرة من الصناعات دي علشان تسد حاجة السوق المحلي منها.
طيب اية اللي عملته الحكومة في ملف تسوية الضرائب للشركات؟.
وزير المالية أحمد كجوك قال أن الحكومة شغالة حاليا علي ٤ أولويات اساسية لصالح المواطنين والمستثمرين والاقتصاد المصرى، وحاليا في شراكة قوية بين مصلحة الضرائب ومجتمع الأعمال بتتركز على الثقة واليقين والمساندة للتيسير على الممولين وتحسين الخدمات وضمان كل الحقوق والالتزامات.
وزير المالية قال كمان أن الحزمة الأولى للتسهيلات الضريبية كل الشركاء والممولين اثنوا عليها، وحاليا الوزارة بدأت التشغيل التجريبي لنظام المقاصة الإلكتروني المركزي بين المستحقات والمديونيات الحكومية لتوفير السيولة النقدية للمستثمرين.
وزير المالية اتكلم كمان علي الملفات الضريبية القديمة اللي موجودة علي الشركات وصغار المستثمرين، وقال أن الحكومة قررت قفل كل الملفات الضريبية اللي كانت قبل سنة 2020 بطريقة متوازنة ومبسطة علشان يحصل ترسيخ للثقة مع الممولين.
وزير المالية قال ان الدولة حطت حدود واضحة لتقييم مسار الإصلاح الضريبي منها امتلاك القدرة على المراجعة والتصويب الدورى، وهيحصل تواصل إعلامي مع كل شرائح المجتمع الضريبي علشان نوصل لكل الناس والمنظومة الجديدة هتربط الحافز بجودة الخدمات اللي بتقدمها مصلحة الضرائب للممولين .
كجوك قال كمان أنه لأول مرة هيتم وضع نظام مبسط ومتكامل ومحفز للشركات الناشئة والصغيرة والمتوسطة وأنشطة ريادة الأعمال واللي حجم أعمالهم ١٥ مليون جنيه هيتضمن حوافز وإعفاءات وتيسيرات جديدة في كل الأوعية الضريبية زي ضريبة الدخل والقيمة المضافة والدمغة ورسم تنمية موارد الدولة والإعفاء من الأرباح الرأسمالية والدمغة ورسوم الشهر والتوثيق ده غير الإعفاء من تطبيق نظام الخصم وهيكون أول فحص ضريبي بعد ٥ سنين، وهيكون تقديم الاقرارات الضريبة للمرتبات والأجور وفقا لإقرار التسوية السنوية.
كجوك قال كمان إنه هيتم لأول مرة وضع حد أقصى لغرامات التأخير بما لا يتجاوز أصل الضريبة علشان ميكونش في أعباءً كبيرة بسبب تأخر الفحص الضريبي علشان نحل المنازعات ونشجع غير المسجلين في منظومة الضرايب على التسجيل وهنفتح معاهم صفحة جديدة بدون ما نبص علي اللي فات .
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
