معروف إن شهادات الأدخار من اهم الخدمات اللي بتقدمها البنوك اللي موجودة في مصر للعملاء، لكن عمرك عرفت أية هيا اعلي شهادة ادخار موجودة في مصر في الوقت الحالي، والعميل بيكسب منها كام وعلي فترة أد اية.. لو عايز تعرف كل ده شوف التقرير ده للأخر.
شهادات الأدخار واحدة من الخدمات المهمة اللي بتقدمها البنوك للعملاء، واللي بيكون عليها اقبال كبير من الموطنين خصوصا لو الشهادة المطروحة الفايدة بتاعتها اعلي من كل الشهادات اللي اعلنت عنها باقي البنوك الموجودة في مصر، وده اللي عمله البنك الأهلي واللي اعلن عن طرح الشهادة صاحبة الفايدة المتناقصة 30% ودي بتعتبر أعلى شهادة بنكية فى مصر في الوقت الحالي .
طيب ازاي العملاء يقدروا يشتروا الشهادة دي وبتبدأ من كام؟.
شهادة 30% دي شهادة أعلن عنها البنك الأهلي وبنك مصر، ودي بتكون علي مدة 3 سنين، وبتتميز بأن الفايدة بتاعها متناقصة بتصرف سنويا وفي السنة الاولي بتوصل الفايدة لـ30%، والسنة الثانية الفايدة بتوصل لـ 25%، والسنة الثالثة الفايدة بتوصل لـ20% .
البنك الأهلي وبنك مصر قالوا أن فئات الشهادات الجديدة بتبدأ من 1000 جنيه ومضاعفاتهم وبتصدر للأفراد الطبيعيين أو القصر من المصريين أو الأجانب، ويتم احتساب المدة من تاني يوم عمل لشراء الشهادة .
البنك الاهلي وبنك مصر اتاحوا للعملاء إمكانية شراء الشهادتين من خلال الإنترنت والموبايل البنكي BM Online وماكينات الصراف الآلي لبنك مصر.
طيب الفايدة علي الشهادة دي بتوصل لكام؟.
في حالة لو العميل اشتري شهادة الـ30% بقيمة 500 ألف جنيه، هيحصل علي فايدة 150 ألف جنيه في السنة الأولى وفي السنة التانية هياخذ فايدة 125 الف جنية، وفي السنة الثالثة هياخذ 100 ألف جنيه، وبكده هيوصل أجمالي الفايدة علي مدار 3 سنوات ل 375 ألف جنيه.
وفي حالة لو عميل اشتري شهادة بقيمة 100 ألف جنيه ففي الحالة دي هتوصل الفايدة علي الشهادة في السنة الاولي لـ30 الف جنية، وفي السنة التانية هتوصل الفايدة لـ25 الف جنية، وفي السنة الثالثة هتوصل الفايدة لـ20 الف جنية، وبكده هتوصل اجمالي الفايدة اللي هياخذها العميل لـ75 الف جنية علي مدار الـ3 سنين هيا مدة الشهادة بالبنوك.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
