من ساعات قليلة أعلن الدكتور مصطفى مدبولي طرح 10 شركات كبرى فى البورصة فى 2025.. فيا ترى ايه معنى الكلام ده ؟ وايه الشركات اللى هيتم طرحها أمام المستثمرين؟ وهل طرح الشركات ده ممكن يكون ليه تأثير على أزمة نقص العملة الأجنبية ؟ وهل كده احنا دخلين على انفراجة اقتصادية؟
الحكومة المصرية أعلنت في الساعات الأخيرة عن خطة طموحة لسنة 2025 بتتضمن طرح أكتر من 10 شركات كبرى في البورصة.. وده مش مجرد طرح أسهم أو جذب استثمارات إحنا بنتكلم عن خطوة اقتصادية مصيرية هدفها الأساسي مواجهة أزمة الدولار اللي كلنا حاسين بيها وزيادة الاستثمارات الأجنبية
حد ممكن يسأل ويقول يعني إيه طرح شركات كبرى؟ وإيه الشركات دي؟ والأهم.. إزاي ده ممكن يساعد في تحسين أوضاعنا الاقتصادية؟
بص يا سيدي .. لما الحكومة بتطرح شركات في البورصة ده معناه إنها بتفتح الباب للمستثمرين سواء مصريين أو أجانب إنهم يشتروا حصص في الشركات دي..والفلوس اللي بتدخل من الطرح ده بتساهم في توفير سيولة بالدولار اللي إحنا في أمس الحاجة ليه دلوقتي خاصة مع الأزمة الاقتصادية اللي أثرت على الجنيه المصري
طب إيه أبرز الشركات اللي هيتم طرحها في البورصة السنة الجاية؟
من الشركات اللي الحكومة أعلنت عن طرحها قريب شركة وطنية و شركة صافي .. ودول هيتم طرحهم قبل النص الأول من 2025.. ومعاهم كمان شركة "سايلو فوود": الشركة اللي بقت معروفة في قطاع الصناعات الغذائية.. و"شيل أوت" اللي بتتخصص في إدارة وتشغيل محطات الوقود وفيه كمان كلام عن طرح حصص من بنوك كبرى زي بنك القاهرة وبنك الإسكندرية لمستثمرين استراتيجيين
وإيه علاقة ده بالدولار؟
الفكرة ببساطة إن دخول استثمارات أجنبية في الشركات دي هيضخ دولارات في السوق المصري.. وده معناه إن هيكون فيه عملة صعبة أكتر متوفرة بشكل هيساعد في تقليل الضغوط على الجنيه المصري.. كمان لما المستثمرين يشوفوا إن فيه خطوات جدية للإصلاح الاقتصادي ثقتهم في السوق المصري هتزيد وهيبدأوا يضخوا استثمارات تانية في قطاعات مختلفة
والحكومة مش واقفة عند الطرح وبس فيه كمان مؤشرات إيجابية تانية منها استثمارات قطرية هتدخل في قطاعات حيوية وده هيزود نشاط السوق.. وصندوق النقد الدولي أعلن إن خطوات المراجعة الرابعة إيجابية وده بيعزز من موقفنا قدام المستثمرين الأجانب.. كمان الحكومة شغالة على مبادرات جديدة عشان تخفف الضغط الاقتصادي عن المواطنين.. والسياحة راجعة بقوة مع توقعات بوصول عدد السياح لـ15 مليون سائح السنة دي
خلاصة الكلام .. إحنا قدام خطة متكاملة بتحاول الحكومة من خلالها مش بس تحل أزمة الدولار لكن كمان تفتح أبواب جديدة للاقتصاد. السؤال المهم هنا: هل السوق المصري جاهز لاستقبال الطروحات دي؟ وهل المستثمرين الأجانب هيلاقوا اللي يدفعهم لضخ فلوسهم هنا؟.. خلينا نقول إن 2025 ممكن تكون سنة فارقة للاقتصاد المصري.. ولو الخطوات دي اتنفذت بشكل صحيح مش بعيد نشوف انفراجة اقتصادية حقيقية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
