في ناس كتير في الوقت الحالي قلقانة بسبب قرب انتهاء فترة شهادات الـ27% خصوصا ان الدولار في الوقت الحالي سعر صرفه ارتفع وكل يوم في جديد وحاليا الناس عندها سؤال واحد هل البنوك هتطرح شهادات تاني بعائد اعلي من 27%.. لو عايز تعرف اجابة السؤال ده شوف التقرير ده للأخر
في شهر يناير اللي جاي هيكون موعد استحقاق شهادات الـ%27 في البنوك خصوصا أن الشهادات دي كان عليها اقبال كبير جدا من المواطنين والناس اللي بتدور علي مكسب مضمون ومش حابين يغامروا بفلوسهم في اي قطاع تاني سواء كان دهب أو عقارات أو قطاعات من قطاعات الاستثمار الموجودة في البلد، خصوصا ان شهادات الادخار واحدة من اضمن القطاعات اللي موجودة حاليا في مصر ومكسبها معروف ومفهوش أي مغامرة والعميل بيكون عارف هيحط فلوسه كام وهياخر فوايد كام ويقدر ياخذ فلوسه أمتي وكمان بيكون عارف لو حب يكسر الشهادة اية اللي هيحصل معاه.
طيب اية اللي هيحصل بعد انتهاء فترة شهادة الـ27 في البنوك؟.
اتعودنا قبل حلول موعد انتهاء شهادات الادخار بتكون فيه توقعات مختلفة بخصوصها وفيه ناس بتقول إن البنوك هتمدها وفيه ناس بترجح أن البنوك توقفها لكن الحقيقة الموضوع مش بالتوقعات لأن فيه لجان مختصة في البنوك بتدرس كل تفصيلة في حكاية شهادات الادخار المطروحة وهي اللي بتقرر مصيرها وهل تستمر ولا توقف ولا هيتم خفض الفايدة بتاعتها..
وعشان كده الخبير المصرفى محمد عبدالعال قال أن تحديد سعر الفايدة على شهادات البنوك بتكون مسؤولية لجان الأصول والخصوم في البنوك.
الخبير المصرفي كمل كلامه وقال أنه من وجهة نظره الشخصية فأسعار الفائدة الحالية على الشهادات والأوعية الادخارية مرتفعة جدًا، والفائدة المرتفعة دفعت ناس كتير جدا أنها تسيب شغلها في التجارة والاستثمار وكل انشطة الحياة المختلفة وتحط فلوسها في شهادات الادخار خصوصا أن الشهادات دي مكسبها مضمون ومش عليها أي ضرائب ولا أعباء مالية ولا قلق بسبب تقلبات السوق وكل شهر عارف مكسبه كام واخر السنة عارف أنه هيسترد أصل المبلغ اللي دفعه كامل وكمان هياخد الفايدة اللي علي اساسها حط فلوسه في البنك.
الخبير المصرفى توقع كمان وقال أن البنوك مش هتقدر ترفع الفايدة على الشهادات مع بداية استحقاق شهادات الـ%27 في العام 2025، خصوصا مع التوقعات المنتشرة حاليا واللي بترجح إن الاجتماع اللي جاي للجنة السياسات النقدية بالبنك المركزي هتاخذ قرار بتخفيض سعر الفايدة، ومش هيكون في اي رفع جديدة للفايدة في مصر .
طيب هو البنك بيكسب ايه من شهادات الادخار خاصة أن فائدتها مكلفة على البنوك ؟
الحقيقة البنوك في مصر خاصة الاهلي ومصر بيطرحوا في العادة شهادات بفائدة عالية علشان تساعد في سحب السيولة من السوق للسيطرة على التضخم في الأوقات اللي بيكون فيها عالي ودي بتكون طريقة لاغراء أصحاب الأموال والمدخرات لاستثمار فلوسهم في الشهادات دي ودا عشان البنوك تقلل من الإنفاق والشراء والاستهلاك في الأسواق وبالتالي أسعار السلع مترفعش بشكل مبالغ فيه
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
