إيه اللي يخلي اقتصاد مصر يقف على رجله في وسط الأزمات العالمية؟ إزاي القطاع الخاص ممكن يكون المفتاح السحري للرخاء والنمو اللي بنحلم بيه؟ وإزاي البنك الدولي شايف مستقبل الدور اللي القطاع الخاص ممكن يلعبه؟
القطاع الخاص في مصر مش مجرد جزء من الاقتصاد.. ده حرفيًا ركيزة أساسية لتحقيق الرخاء والنمو المستدام.. والبنك الدولي في تقريره الأخير أكد إن القطاع الخاص هو المحرك الرئيسي للابتكار لزيادة الإنتاجية وكمان لتوفير فرص عمل جديدة.. وده مهم جدًا خصوصًا في بلد زي مصر عدد سكانها بيزيد كل يوم
لكن لو بصينا شوية على الأرقام هنلاقي إن استثمارات القطاع الخاص في مصر على مدى العشر سنين اللي فاتوا كانت حوالي 6.3% من إجمالي الناتج المحلي.. و الرقم ده بالنسبة لدول تانية في نفس المستوى الاقتصادي يعتبر قليل شوية لأن المتوسط في الدول متوسطة الدخل بيكون 3 أضعاف الرقم ده
طب مصر بتعمل إيه علشان تعالج القصة دي؟
الحكومة المصرية حطت خطط طموحة جدًا بحلول سنة 2030 منها مثلاً رفع نسبة استثمارات القطاع الخاص لغاية 65% من إجمالي الاستثمارات وجذب استثمارات أجنبية مباشرة بقيمة 60 مليار دولار سنويًا وكمان زيادة الصادرات لـ145 مليار دولار.
طب دي أرقام ضخمة.. إزاي هنحققها؟
هنا بيظهر دور البنك الدولي اللي شايف إن مصر عندها فرص استثمارية واعدة جدًا في قطاعات زي الصناعات الزراعية، الصناعات التحويلية، وتكنولوجيا المعلومات… والبنك الدولي كمان شايف إن مصر ممكن تتحول لمركز رقمي إقليمي يخدم منطقة الشرق الأوسط وأفريقيا
البنك الدولي مش بس بيحط كلام على ورق.. لا، ده كمان بيدعم بمشروعات حقيقية على الأرض مثلاً مشروع مجمع بنبان للطاقة الشمسية.. اللي بقى واحد من أكبر مجمعات الطاقة الشمسية في العالم وكمان ساعد الحكومة المصرية في إصدار السندات الخضراء
من سنة 2020 لحد النهارده، البنك الدولي قدّم أكتر من 3.7 مليار دولار لدعم القطاع الخاص في مصر.. والفلوس دي دخلت في مشروعات زي الطاقة المتجددة، تطوير الموانئ، الصناعات الزراعية، والرعاية الصحية. وحتى التحول الرقمي كان ليه نصيب كبير من الدعم ده
لكن علشان القطاع الخاص يشتغل بكفاءة ويحقق الأهداف دي، في حاجات لازم تتحسن. البنك الدولي بيقول إنه ضروري نحسن القضاء التجاري علشان إنفاذ العقود وتسوية حالات الإفلاس تتم بشكل أسرع وبيشيد بدور لجنة تيسير التجارة المصرية اللي بتسهل حركة البضائع وبتختصر الوقت بشكل كبير
خلاصة تقرير البنك الدولي بتقول ان مصر ماشية على الطريق الصح والقطاع الخاص هو العمود الفقري للرحلة دي بس الهم ان شركات القطاع الخاص تكون جاهزة تاخد الدور ده وتقدر فعلا تكون محرك يقود التمية الاقتصادية فى البلد
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
